士多啤梨彩繪蛋糕卷

      上次焗了隻熊熊撕開紙見有紋,唔LIKE.
其中一個原因:
係我加左小小水在焗爐紙下面.唔想張紙彈起,唔貼盤呀.
反而衰左..........

圖中3隻士多啤梨.
有2隻我刻意留了光位. 像油畫都要留光位才立體.
焗完一看反而唔自然..
左填右補......就變成咁樣了.

煙燻豉油雞

為了家人口味,食得有驚喜,煮菜都要多變,
我間中喜歡把豉油雞燻一燻,
呢隻豉油雞有少少玫瑰花香,因為我用左法國玫瑰乾花燻了5分鐘,別有一番風味.

如何燻雞:

1.鑊舖上錫紙,邊沿都包晒,放入2-3湯匙生米.茶葉2湯匙,
玫瑰花乾2湯匙 (弄開成小片).1/4塊片糖,弄碎.
所有材料拌勻,蓋上蓋,大火煮至見到煙冒出.
放入豉油雞,上蓋.小火燻3分鐘.熄火再燻2分鐘.
(蓋內面都要用錫紙包好).

小小心得:
如果唔將鑊包好,燻完雞隻鑊會燻到黑麻,洗唔得乾淨呀!
除非,家中擺放多1隻舊鑊,燻到黑炭頭都冇所謂啦!

泰式烏頭(得獎)

2013年6月19日下午5:53公開累積瀏覽 1606 5

 

從未想過20元烏頭;令牛牛你食得咁開心.
甘心掏腰包買一套魚型模送給我,以示獎勵喎!
我近日真係食左好多條烏頭呀.

有時想湯更鮮,我會加入大大隻蝦仁,
蝦乾,瑤柱,買唔到草菇,用雜菜豆...

唔係吹水,真係好好味......一粒豆都啄光.
食譜已經打過.
心底話想同大家分享一吓.
吳太曾經給牛牛氣得好緊要,
幾乎發誓,以後都唔買烏頭食!
估唔到今日真的愛吃,百食不厭.

你地話係咪世事真難料呢?

吳太今晚煮咩餸

2013年6月3日下午8:00公開累積瀏覽 1497 8

 

桌上有惹味的炸菜豪油蒸雞,
咸蛋蒸水蛋,蒜茸菜芯.
兩條泰式烏頭.
開心價合共$108大洋.

唔知吹咩風,牛牛咁欣賞我煮的烏頭,當然樂意煮啦!
呵呵...今次我唔會擺烏龍,手多多加辣椒糕嘞.
咁樣個魚湯先會清,鮮味十足
不過,就加左1包泰國粟米仔,細條又精緻(爽口又清甜)
時間剛剛好,可以坐定定一起食.
看來我真係要買條魚型模,滾住食至得嘞!

美味二人晚餐60元 -泰式烏頭.食譜

 

2013年6月1日下午5:15公開累積瀏覽 1838 8

 

眨眼又一個星期喇!
星期五,多數都係得牛牛陪我食晚飯.
雖然得兩個老人家,都要有番幾味ga.
呢餐超平連甜品6杯都係60大洋,自己都讚自己呀!
有泰式烏頭,肉碎蒸水蛋,蒜茸炒菜芯.
好好味的芒果布甸.
仲有隔餐話梅豬手5件.未計在此數.

講起烏頭我就一把火.
見牛牛每次食泰國嘢,都勁愛明爐烏頭.
試過幫襯好幾次小店,在條街食都要138大洋.
又酸又辣,我次次都係淺嚐,都頂唔順.

n年前想討好牛牛做過鹽焗,檸檬或鼓汁蒸,
反應都係ok啦.
記得有1次,牛牛直情叫我以後都不用買,
因為唔係果種烏頭喎!

我開始發嬲,呢條係元朗烏,好貴呀,都唔好食咩??
咁你出街點解次次都愛食bor?
我夠最爭食烏頭啦.....以為你鍾意先買咋.

牛牛:我理得你幾多錢,呢d魚肉又老又鞋,貓都唔食呀!
我一怒之下,3年都冇再買了.

直至昨日,見大大條烏頭20元.
想起近日到金不換食1條二百大洋.好
自己荷包得幾拾,別無他選,即買啦.!
估唔到今次牛牛食得津津有味,仲大讚好yummy呀!

呢味肉碎蒸蛋夠平又好食.
6元冰鮮肉120g.2隻蛋$2.4合共$8.4.

好開心,今晚全部估清.碟碟都食到可以照鏡,
好滋味又溫飽呢!

牛牛話我做錯,呢味叫吳太烏頭呀!
因為我手多多落左辣椒糕.
佢話個湯唔得清啦.
做法:我用簡易方法煮.
1.魚用鹽,胡椒粉醃2-3小時.
2.我用少少油炒紅蔥頭,香茅,(白色部份用刀拍扁),南薑,檸檬葉捲起切幼條.
加草菇,3-4粒切開,蕃茄1個,加3碗水,2湯匙魚露,丁多糖,滾10分鐘.
3.將烏頭,椒放入,魚每面浸4分鐘,間中淋下湯.至熟.
最後加半湯匙青檸汁,芫茜.....魚滑又有啖湯飲,正.
我打算買個魚型器皿回家,滾住食,更有風味.

溫馨提示:
我喜歡把魚浸熟,魚更滑,湯味更鮮.

自家製意大利麵(食譜)/ 鴨蛋麵/南瓜麵

 

2013年5月14日下午4:40公開累積瀏覽 1102 7

 

買了部整麵機已經一年了.
(因當時見blog友翠兒整得好靚,好心動呀!)
點知我只係玩過1-2次,就怕怕了.
只好久不久走去翠兒blog,睇下,羨慕一吓.

翠兒的火龍果麵.


我要如何形容呢部整麵機呢?!

你像一匹豪放不羈的馬.
完全不受我操縱.

氣憤.....塞入柜的深深處.冇眼睇.

直到近月,認識blog友半日安,
被她製作的意大利麵條,餛飩吸引起來,心思思了.
才把麵機從冷宮托出來.
經多番努力
嘩.....終於都有麵滾出來,好感動呀!

不過,我做得嘛嘛,口感要再努力.....
但實在太肚餓,食晒一碗喇.!


經過兩日的練習,我剛剛整到又長又薄麵條,
似意大利寬闊條麵嗎?
立即煮左幾條,好爽好滑好Yummy呀!

玩玩玩,一個下午好快又渡過了.
整左好多南瓜麵.(低筋+少少高筋).真係色香味俱全.
鴨蛋麵全部用高筋粉做,
顏色冇咁吸引,但好似更爽口!

呢碗麵就係我今日的午餐,黃色的是南瓜麵.
米色的是鴨蛋麵,奇怪點解鴨蛋麵咁淺色呢??
好幼的係香草加黑胡椒.
好YUMMY呀!

睇我玩到.....整個下午,一言不發,自得其樂.好ENJOY
剛做好的麵,我愛掛在筷子上.

多漂亮.....像銀幕,像一串一串的夢

食譜 來自Blog友半日安.
好多謝你的分享.
好詳細,

 

材料，只有《麵粉，蛋 (比例 1：1)，鹽(適量)》，搓成粉糰，閒置 30 min！


再用壓麵機，做出 意大利粉............
記得放入壓麵機最闊位開始，壓出來第一次的麵糰後，要 左,中,右 fold 起，一共做三次，跟著一層層地跟著壓麵機壓到最薄便可，其間若粉糰太黏的話，要記緊灑些手粉，免麵粉糰黏在一起！


Yeah。。。啲麵條好整齊！
再閒置 30 min 再滾水淥 2 min 左右，就可以。

我見剩咗啲麵粉糰，又順手整幾隻意大利雲吞！

家裡有些少波菜，先淨，淥熟後，揸乾水份，刴碎，加入乳清芝士，我再加入了些吞拿魚醬，記得所有材料要完全揸乾水，加在一起，下些鹽，加些糊椒粉，撈勻再放入雪櫃，待雲吞皮預備好，便可以包雲吞了！


包雲吞............
記得在雲吞包口，先塗些水，方便黏著後包！！！
雲吞的花邊，我用叉子壓成花邊！

後記:
經過兩日的練習,我可以做出美味的麵,
好開心送比爸嫖媽食.


半日安,多謝你

話梅豬手/香煎鯖魚柳

2013年4月27日下午4:43公開累積瀏覽 2324 10

兩星期內,已經煮了3次話梅豬手.
次次都好yummy.多謝Blog友Eva的分享.
上圖係第1次整,豬手細少少,1斤半左右.
可能唔夠老抽.原來家中只剩1湯匙咋.
所以,顏色唔夠deep.一樣好好味,最緊要夠淋又入味.
後來,買大少少,兩斤重的豬手,
初時,食剩兩件....轉頭又可以食光.
只剩下兩粒八角,4片薑,1小塊桂皮咋.

近日,百佳的鯖魚柳特價每包$8.8 有1條.
洗乾淨,索乾水,用少少白胡椒粉,五香粉醃15分鐘.
煎時撲上少少粟粉,煎到皮脆.
又快又好味,仲好經濟Tim

金箔鮮奶炒蛋白

2013年2月14日下午9:56公開累積瀏覽 786 4

 

今日係情人節.祝你們情人節快樂呀!
你有沒有送禮物給愛侶呢?
我就已經送上一味好high的菜式給牛牛嘞!
叫金箔鮮奶炒蛋白,係咪好high呀!
話比大家知,為了整呢款菜.
我已硬食左兩隻蛋白喇.....因為勁標水出水呀!
經過兩次失敗,今次就好有信心了.*驚少D咋*
睇吓...一瓣一瓣成朵花咁,影完相都唔出水嘞!
一放上桌面,牛牛馬上品嚐.....
好滑好味,只可惜,欠了一味叫X醋,差少少咋!
呵呵.....真沒想過1隻蛋白都可以令牛牛食得津津有味.
食譜:1人份量
蛋白30g
鮮奶30g
雞粉少少.1/16茶匙
粟粉3.5g
油幾滴
金箔少許
做法:
1.先用10g鮮奶加粟粉,雞粉拌勻,再加入其餘20g鮮奶.
2.蛋白打起泡後,唔要面的泡.加入(1)料鮮奶拌勻.
再加入油拌勻.
3.燒熱鑊,落油見出煙.浪勻,熄火.
4.將鮮奶蛋白混合料(再次拌勻)先倒入.
推吓剷吓,待蛋凝固上碟.
推成心心更表心意

椒絲腐乳蒜香雞翼-食譜

2013年1月9日下午1:02公開累積瀏覽 3045 4

 

嘩....雞翼香噴噴,一面煮,一面口水流呀!
忍唔住偷食了兩隻呀!
食譜改篇自Annie Wong 原食譜中蝦8隻
因為我兩日前自己食晒半斤茄汁蝦碌,
所以改用雞中翼.一試難忘
材料:   
雞中翼1磅半.    
鹽1/2茶匙.    
粟粉1湯匙
紅椒1隻
蒜茸1湯匙     原食譜用乾 蔥
腐乳4磚
玫瑰露1又1/2湯匙.   原食譜用2湯匙紹酒
水4湯匙
糖半茶匙.
**由於我的相機壞了一個星期,
近日出BLOG的照片,只能用手機拍下!
做法:
1.將雞翼洗乾淨,索乾水.
2.加1/2茶匙鹽醃半小時.
3.煎的時候再撲少少粟粉,
4.燒熱油,將雞翼兩面煎至金黃,7-8成熟,取出.
5.用餘下油,炒香蒜茸.蔥段.
倒入腐乳汁料,(腐乳,水,糖,酒,預先拌勻至滑身)
**可加多半湯匙水
6.將雞翼回鑊兜勻,加蓋收細火煮2-3分鐘至熟.

 

溫馨提示:

雞中翼皮下脂肪較多,
特別1塊呈三角形的皮,可以剪去.
用剪刀在翼底剪開少少,快熟易入味.

荷葉瑤柱滑雞糯米飯

2013年1月5日上午12:23公開累積瀏覽 1744 5

 

忘了加老抽呀!個糯米飯唔夠色水!

下次加少少蠔油仲正.
雖然外表一般,原來係好好味的.yummy
亞仔吃到唔停口.冇剩就知啦!
食譜:
1.瑤柱2粒,水145g.浸軟後水剩130g留用.
2.糯米150g加入瑤柱水130g.1/4茶匙鹽,浸半小時.
3.米吸收瑤柱水後,會剩30g左右留用.
4.將米放進荷葉,加1/4茶匙油拌勻.
荷葉要先舖入器皿內.而且要重疊遮孔.
5.先加入15g瑤柱水在米上,
荷葉要打開,大火蒸12分鐘.

6.再加入餘下15g水,
加入醃好的雞,瑤柱(撕開).兩粒紅棗.可按個人喜好.

7.將荷葉覆蓋好,再蒸10分鐘.
趁熱食,香噴噴

小小心得:
1.蒸飯其間,分2次加入水,拌勻,

蒸完唔怕食硬飯!
2.荷葉放入滾水煮一會,待軟身才可用水洗.
直接用水洗會裂開呀!