心太軟

 

人畫牡丹我畫牡丹,

點解自己老是畫得不好呢!

一連幾晚睇到頭昏腦脹,夢寐難求!

死死氣走入廚房整心太軟,

由於皮同餡係分開做,一定有漿流出來.

唔會焗出朱古力蛋糕來.

不過,今晚改用另一方法做皮.

難食到跳起,挖D漿食幾啖算嘞!

都係早幾日果隻的外皮正!

有空同大家分享!

失敗的彩繪蛋糕

買買買,

買了本書回家很久了.....連一個蛋糕都未做過.

今日中午的起心肝玩吓啦.....點知衰左.!!

衰咩呢?

撕去焗爐紙,熊熊是摷皮,好多皺紋呀.

 

.

 

好不甘心,唔捲嘞.

下次畫完都係焗20-30秒好lu.

或者整張紙預先噴濕少少

用不沾布唔知會唔會好D呢.

其實,今次都係分兩次焗,用160度每次1分鐘.

點解張紙會起皺紋呀?????

 

 

蜂蜜蛋糕(沒SP)-製作圖

2013年4月6日下午4:45公開累積瀏覽 2394 5

 

圖片供有興趣做蜂蜜蛋糕的朋友參考.

圖中的麵糊已經將所有材料混合.

靜止了大約10分鐘,期間面會有少少氣泡走出來.

我先用膠刮輕輕刮平,剷底Fold幾吓以防止蜂蜜,油下沉.
這動作我做了兩次,才將麵糊倒入模.

倒入時,要留意麵糊的狀態.
可用膠刮拌勻,才平均倒入模.(特別係盆底的麵糊)

焗了2分鐘,第1次拉出來,用膠刮攪拌的樣子.

我是先用160度焗,開頭每2分鐘拎出來用膠刮攪拌1次.
目的再去除面的氣泡.蛋糕組織更細緻,總共做3次.
然後,放在中層再焗20分鐘,待面上色.(要睇火)

上圖係第3次了.看看糊的面,已經好平滑,再也不見大氣泡.

*每次拎出都要小心輕放,以免影響蛋糕的組織.
*拎出來,面糊好像有一塊薄皮,正常.

將皮攪破,小心拌入糊中.

如果到這個步驟,大氣泡依然湧現,好大機會是失敗了.
呢個木兜size內計15cmX15cmX8cm
我在吉之島12元店買的.
因原本的蜂蜜蛋糕模太大.
但我一直都對其平直的面極之好奇.
所以我一見呢個木兜,就如獲至寶.
買回來,小心把底板去除.


食譜:可做15cmX15cmX8cm 1個(12件)
雞蛋5隻265g(去蛋殼計)
砂糖90g,鹽少少
低筋粉100g,高筋30g

台灣蜂蜜40g(入爐)
菜油30g,牛油10g,味冧10g,鮮奶10g
做法:
1.全蛋打起泡,分多次加入砂糖,打至奶白色.
我打了差不多20分鐘.(高速)
**曾經試過打9-10分鐘,寫了多個流暢的8字.
以為今次仲唔掂.....   結果,HONEY都係沉底呀!

2.麵粉分多次篩入.
我分8-10次.
3.將幾湯匙麵糊加入蜂糖混合物拌勻
再分次加入(2料)的麵糊拌勻.
登兩吓,登走氣泡.
(honey隔熱水加熱,加入牛油,油,奶,味冧預先拌勻.)
4.預熱焗爐用160度焗20分鐘至面上色(中層)*不計消泡過程.
記得要每2分鐘,拉出來消氣泡,共做3次
移到下層,用150度再焗20分鐘.
我試過沒有用物件壓面,都幾平直.
除幾隻角差少少.但切邊後都可以.

小小心得:
1.如想壓面,最好用金屬板,在最後5-10分鐘蓋上.
不過,如蛋糕的升發未如理想,上唔到頂,
就壓唔到嘞.
除非,準備多一塊較細的板,可放入模內的!
2.記得蛋糕面先加一張牛油紙才蓋上板呀!

Chocolate Brownie朱古力班尼士-附加食譜

2013年3月3日上午12:11公開累積瀏覽 410815

 

努力中的朱古力班尼士
好多時,我行經Mrs.Fields都會口痕買幾件Brownie.
除了感覺太甜,可能係人老怕甜卦?價錢都not平架.
(面有合桃的比較冇咁甜,我剛可接受)
但口感卻極之喜愛.nuts又多又脆,朱古力味算是香濃
今日的起心肝試吓在家做Brownie.
呢款cake,在美國好受歡迎架!
第1盤出爐,唔係我要求的口感.(上圖右面第1件)
如何形容呢! 唔係唔好食,
但只係好似食朱古力蛋糕lor,
即使雪過,都係沒有朱古力的黏性bor.
同呢個食譜say good-bye

於是,參考幾本書,本本書都係教人焗Brownie.
我唔想又失敗,決定用另一個方法做Brownie.
當佢係日式cheesecake坐水焗.
估吓....work 唔work呢???
出奇地,效果真的有黏性呀,面仲脆tim.Yeah(上圖左第1件)
叫牛牛和細仔試吓先,兩人口感一致.
佢地都認為用坐水法焗的Brownie真的更美味呀.

嘩嘩....太興奮,看看製成品,瘋狂嗎?
左排係腰果,右面兩行係合桃

我真係唔相信在家可以做出美味的Brownie.

半信半疑??
還是專程去買幾件回家慢慢品嚐.
左一啖,右一啖
看看自己的Brownie可有再改善的地方.
大家可以細看前面4粒的質感.再集中看中間兩粒.
兩粒擺的方向一致,有合桃的是切口,沒有合桃平滑的是底.
組織好像差不多.
其實,上圖左下角兩粒細粒d的合桃Brownie,係買回來的,
即是我平日口痕,心情唔好都會買的架.
每粒約重15g.
右面係自己做的,大些少,18g-20g.
質感:當然好正啦,朱古力味濃郁,
可以含住在口內,慢慢嗒....
我再強調 Brownie 的口感,不是像一件朱古力蛋糕!
唔好長氣,打個食譜出來先:

食譜:可以做1條 長形7吋x3吋,切開有 14粒.@18-20g
1. 55%黑朱古力片75g.
2. 牛油40g (室溫放軟),Rum酒1.5茶匙

坐溶黑朱古力,將牛油分多次加入,拌至冇粒幼滑.
加Rum酒1又1/2茶匙拌勻拌勻成朱古力漿.

3. 黃糖48g(牛牛的口味),仔仔喜歡53g.
4.雞蛋52g(去殼)

蛋加黃糖,鹽(選擇幼細的)打至糖溶,上圖我係用糖粉.
所以係淺奶黃色. 但顏色,質感容易看得更清楚.
分3次加入朱古力漿,用手動打蛋器拌勻.

5.(低筋粉30g,無糖可可粉10g,發粉1/4茶匙.)
粉類全部過篩.加入(4)朱古力漿溶液,拌至沒有粉粒.

6.合桃50g 用120度烘4-5分鐘,切碎.
將朱古力麵糊倒入模,刮平表面.面舖腰果/合桃粒.
*模底要放牛油紙.*

7.鹽的份量大約1/4茶匙分開3等份,只取1份.


預熱焗爐8分鐘,用160-170度焗35分鐘,倒去水份.
用同樣溫度再焗10分鐘.
取出放涼期間,餘溫會令蛋糕剛好熟.
放涼入雪柜,雪到凝固才切件.

溫馨提示:
記得坐熱水焗,水位大約半吋高.
*我曾經試過不加入發粉,雪後口感差不多.
所以無須加入.
製成品放入盒內,可以雪10日呀!

10戰蜂蜜蛋糕-食譜

10戰蜂蜜蛋糕-食譜

2013年3月19日下午4:14公開累積瀏覽 344116

 

如果我沒記錯,上圖已經是我的第6戰蜂蜜蛋糕嘞!
雖然比唔上第5次做的好,之前一頁post出來了.
底面都好筆直,組織又細蜜.
但今次總算唔錯,沒有sp的蜂蜜蛋糕,係咁樣啦!
沾沾自喜,走到Taste 買一件回來.
中間細小的是買回來的,


蜂蜜味我的比較濃.但我的比較甜左少少呢.
牛牛話想我食,要減糖呀.....
下圖是我第7戰蜂蜜蛋糕.忘了那一件是自己做的.
看了一會,我估計右面那小件是買的....又再傻食!
食到我食飯都冇胃口.好彩,牛牛讚番吓,有水準喎.

到了第8,9戰.....全軍覆沒呀.
哎呀!一大片油層又又又沉底啊.
氣得我一手塞住大口仔個口.

今日是第9 戰了.
失敗得好大意,原來粉的重量錯了,,少了1/2.
所以一出爐便塌下來.都唔使拍照啦!
真氣憤.....未夠鐘煮飯,又再瘋癲過.
決定10戰蜂蜜蛋糕
此時此刻,窗外刮起大風,天色昏暗.雷聲隆隆.

我忽然感到自己多麼多麼的幸福.
可以做自己喜愛的事.
登登登登.....10戰蜜蜂蛋糕出爐喇.
好味...yummy
如果個面夠胆烘得更金黃,就更好.

等我擺番件入袋先.

由於我極度貪玩,唔想食到滯.
所以食譜比較迷你. 失敗都冇咁肉痛

食譜:可做1個,(10cm x10cm x5.5cm)內計的木框

1.雞蛋1隻半合共80g(去殼計)
2.糖27g,幼鹽少許**牛牛再少d糖25g,加些少lemon juice.
3.低筋粉30g,高筋粉9g
4.台灣蜂蜜(入爐)12g
5.味冧3g
6.鮮奶5g
7.菜油10g,牛油2g

食譜看似簡單,至於做法,真係幾複雜.
想問吓,有冇人有興趣玩呢!??
都係買件食好過lu....係咪

如果有人唔怕失敗,又好有興趣整的話,留言給我啦.!
我把製作過程,圖片post出來,大家硏究.

後記:
蜂蜜蛋糕製作流程已經POST了.有興趣慢慢睇啦.
有問題歡迎你留言.

日式芝士蛋糕-附食譜/不裂面心得

2013年1月6日上午12:33公開累積瀏覽 2281521

 

哈哈哈....終於都整番個鵝蛋形日式芝士蛋糕.
之前見到blog友整都好恨,但又唔捨得買多個模.
實在太多了!
原來用呢個器具都 work bor!
呢個cake,晚飯後三分鐘,牛牛竟然食了半個呀!
我完全沒想過佢會食喎,又話唔like 芝士???
牛牛 一面食,一面細細聲:都好好味,好滑...!
讚老婆都唔得大方,氣壞!

Cheese Cake咁美味,當然要用軒軒送給我的一對靚杯,
沖杯茶,慢慢嘆啦!

真係特別好味道,多謝Eva,你真細心!

呢個心形芝士蛋糕,已經送了給朋友仔.
唔知佢地食晒未呢??

至於點解有信心百分百唔裂面呢?
明天同大家分享.....我要zzz了.
仲有全新食譜,做法.
送給喜歡食日式芝士蛋糕朋友.一起硏究!
Sorry,要大家等!
我呢隻夜貓依加先有空呀!
今日,用同等份量整了呢個6吋日式芝士蛋糕.

好心急呀.....我要切開睇吓質感先.
組織軟綿綿,好滑bor,連丁多大氣泡都沒有呀!
我只係輕敲兩側兩三吓咋,大力D都唔敢,怕甩底.

由於昨日的CAKE分了兩份,鵝蛋,心形.
薄了好多,當然唔裂啦!有咩咁叻bor????
我都係要整番個6吋圓形模,**最易爆裂.**
9 成full.測試一吓.更準確.

如果裂到好醜樣,或者縮水好多花紋就唔敢post食譜.
唔想令大家失望呀!

上圖的CAKE已經放涼,只有輕微回縮.係正常.
個面夠唔夠靚仔呀?

嘩...呢三件,牛牛剛才一口氣食晒呀!差不多半個呀
肥c呀,雖然我加了少少檸檬汁,食落冇咁膩姐!
佢仲話入口即溶,容咩易吞落肚喎

食譜:可做6吋圓形1個
心形兜會全滿要拉起圍邊

忌廉芝士 100g
淡忌廉 110g
牛油 (銀寶) 20g
蛋白3隻 96g
蛋黃3隻 60g
砂糖 48g
低筋粉 20g
鷹粟粉 10g
檸檬汁 7g
檸檬皮半個*只要表面黃色皮,白色會苦.
蛋白他他粉1/8茶匙
　
預熱焗爐8分鐘,用140度,坐熱水90度.
放入下層.
焗35分鐘降溫至130度,再焗25分鐘.
我嫌個面唔夠金黃,用150度焗分半鐘.只開上火.

做法: 太多相,太多嘢talk,又要明天了!真抱歉

我地又繼續,8/1/2013,下午5:45
希望我呢個方法可以幫到手,
能夠焗到入口即溶,仲要唔裂面的芝士蛋糕!

1.忌廉芝士室溫放軟.用電動打蛋器打至滑身.
2.加入淡忌廉用膠刮或手動打蛋器拌拌至冇粒.
我係分兩次加入,初時見有大粒,正常,唔使驚.,
拌多一會就好滑,有彈性.如下圖.

3.再加入牛油(坐溶)拌勻成芝士糊.
4.蛋黃用電動打蛋器打40秒.加檸檬汁,低筋粉,粟粉拌勻.
倒入(3)料的芝士糊拌勻.要沒有粒粒.蓋上保鮮紙.
5.竅門:放入冰箱雪25分鐘.
6.蛋白加入1/8茶匙他他粉,分3次加糖打發至拉起有
三角形,短勾可以搖動.(比較實).
反轉,條尾都會向下.

7.取出1/4蛋白同冷凍的芝士糊混合.
8.再將混合的芝士糊倒在蛋白上,
先用手動打蛋器拌,再用膠刮剷底拌勻.
9.把拌好的漿倒入6吋圓形模,輕敲兩側排氣,
模底先放入牛油紙,內側掃上一層好薄的油.
有430g重呀,9成滿,真係心驚驚,爆裂就冇眼睇

10.蛋糕模放入焗盤,連盤一起拎實,登一,兩吓.
焗盤注入熱水,90-100度都OK.
因為兩個溫度我都試過.
活動模,先包保鮮紙,用少少水更貼模,

再包上錫紙,錫紙穿了入水,都冇事.

下圖的心形日式芝士蛋糕,
係我3年前做來送給韋太的,
係咪愈睇愈靚呀!
個兜有透明蓋,幾元1個.送比人又靚又好方便!

 

連日來整了兩個心形日式芝士蛋糕,
都係用放入冰箱雪凍,再mix蛋白的方法.

牛牛已經送晒比朋友食嘞!

我喜愛用呢款模,

係因為送給朋友好方便!

呢度有320g,焗了30分鐘的樣子,幾滿呢!
我試過倒晒430g入模,但一定要拉起圍邊.

 

小小心得:
多年來,我習慣用一大個可以入爐的玻璃器皿載住架.
我相信有隔下火的作用, 對唔會焗爆面都有多少幫助!

用錫紙兜模會有少少浮上水面.但唔會影響蛋糕.