母親節愛心炒麵

 

一年一度的母親節快到了!

祝大家有個快樂的母親節.

送上我的愛心炒麵!

 

今天早上11點.懶洋洋的我才慢吞吞爬起身!

仔:媽去飲茶啦!

玲玲(我):今晚都訂左位出去食飯.依加又飲茶.

冇二三百元都走唔甩啦!

 

雪柜仲有碟隔餐魚餅,什麼地中海炒飯.

唔食咪又係要我倒,真浪費.

 

等我炒碟鼓油皇炒麵你食地啦

急急腳走到牛牛耳邊.

悄聲細語,合作唔好Say No呀!

 

食譜材料:

隔餐鯪魚餅2-3兩

壽桃牌麵5個

洋蔥1/4個切幼條

雞蛋1隻打散,加2滴油拌勻

生抽/老抽各2茶匙

做法:

1.燒熱一大鍋滾水.加入1茶匙鹽,油.

將麵放入,用筷子鬆開至軟身

2.倒入篩入,沖水直至麵涼爽,加1茶匙油,

用筷子挑起麵,拌勻.

3.燒熱,1.5湯匙油煎蛋.盛起.再炒香洋蔥至軟身,加入切片的魚餅略炒,撈起備用.

4.加多少少油,將麵加入炒香,分兩次加入生抽

,再加入老抽炒至顏色均拌,合心意

5.再加入炒好的魚肉,洋蔥,切條的蛋即成.!

 

溫馨提示:

炒麵要唔黐底.鑊一定要燒紅.

麵沖冷水後,要瀝乾水份.

我習慣用剪刀剪幾吓,剪短一點,易炒易食.

再用筷子挑散,反底上面,趁機出力登多幾吓,

盡量把水份瀝乾,加油拌勻,唔怕邊炒邊黐底

炒時最好一手握鑊剷,一手拎長筷子.

兩手一起炒,麵更易炒散!