我喜愛的照片

我每次看到這張照片,都會發出甜絲絲的笑聲.

 

攝於愉景灣.

當日,愉景灣的天空好像特別蔚藍色.

 

看呢個巨三角形玻璃窗

在這裡一聲你願意我願意.

就開始人生另一頁了.

 

 

我地食咩嘢,味道如何?

我已淡忘了.

唯獨鳥兒玩水一幕,深印腦海中.

好羨慕呢!

 

瑤柱臘味蘿蔔糕-食譜

 

 

 

 

 

 

一連蒸了3晚蘿蔔糕,試了多種方法又磨茸又炸汁.
最後都係用刀切蘿蔔,加入上等瑤柱水.
蒸出白雪雪的蘿蔔糕,入口又食到蘿蔔的爽甜,
料的香口又唔會太硬un牙.
先至得大老爺牛牛1個good字咋!
 
食譜:可做1條大約7x3吋

材料.A

1.白蘿蔔 去皮200g
2.臘腸 （半條）
3.瑤柱 （2粒） 200g溫水
4.蝦乾10g  100g溫水.
5.冰糖 10g
6.油 1湯匙
7.白胡椒粉少少.(1/8茶匙）
8.鹽1/4茶匙
9.薑1薄片
 
 
材料B
粘米粉 100g,澄麵粉8g,糖1/2茶匙,雞粉/油各1茶匙.
 
先將粘米粉和澄麵粉混合過篩後,加糖,雞粉,水140g拌勻.
最後加油拌勻備用. 粉漿挑起時可以瀉下為合適。

做法:　

1.用溫水200g將瑤柱浸軟。大約浸15分鐘.
手撕開幾份連水蒸20分鐘,焗10分鐘,就成上等瑤柱水.
將瑤柱手撕成絲或用菜刀壓開成絲.
2.臘腸蒸15分鐘,洗去表面油,切成薄片/或細細粒.
3.蝦乾沖洗乾淨,用100g溫水浸軟.瀝乾水,切粒.
4.把200g白蘿蔔切粗絲,約1吋多長備用。
 
5.燒熱後下1湯匙油，爆香瑤柱絲、加入臘腸碎略炒香，
盛起備用。.
6.用餘下油,爆香蝦乾.要炒到聞到香味.
加入一片薑,白蘿蔔絲，快炒一會.
再加浸於瑤柱水,蝦乾水,冰糖,鹽煮至透明。(取出薑).
7.熄火,徐徐加入已開好的米粉漿,邊落邊攪成滑身的米糊狀.
然後,開小心,不停攪,剷底,慢慢再煮至成濃稠一點.
8.加入一大半爆香的瑤柱絲、臘腸,蝦乾拌勻.
9.倒入模,用匙或膠刮整平糕面,
再灑上餘下的瑤柱絲、臘腸蝦乾在糕面, 輕輕按平.
 (蒸好的料會更貼面,切件煎都唔會甩到一鑊料)
  
7.蓋上錫紙,大火蒸45分鐘至熟.
用竹簽插入後不沾粉即可。
粉同水的比例:
蒸完瑤柱水得180g,2粒瑤柱都幾索水.
浸蝦乾水97g.
瑤柱水180g+97g浸蝦乾水=277g.
煮完蘿蔔後量得180g.
開粉用了140g,
計一計數: 大約320g水份對108粉.
溫馨提示:
1.瑤柱絲要索乾水,否則,一下熱鑊如炮竹聲,條條彈起.
(遇此情況,切勿慌張走人,馬上加蓋,熄火)
2.將粉開成粉漿,加入煮熱的蘿蔔水時,容易拌勻.
如開住火,火力要好細,你大火少少,粉即沉晒底,仲黐鑊.
3.蓋上錫紙就冇倒汗水.
4.大老爺堅持,自家製蘿蔔糕要加薑才完美,去寒涼喎!

大尾督-士多啤梨自摘娛樂園

 

 

 

 

士多啤梨園的門口

 

今日,係我們第一次走進士多啤梨園.好開心呀!

我好雀躍地摘下第一粒紅噹噹的的士多啤梨.

停不了手.....摘呀摘.

不時聽到小蜜蜂嗡嗡聲,佢地正在採花蜜呢!

我要小心一點,傷害到小蜜蜂就唔好啦!

這裡的交通算是方便.

出大埔墟火車站,

轉20C前往大尾督的綠色小巴.

大約20分鐘車程可到達.

沿途經發記士多.

下車後,過馬路就見燒烤王入口,沿路前行轉左.

多行1分鐘便可到達士多啤梨園.

50元1磅. 我摘了1.5磅,負責人只收75元.

溫馨提示:

負責人好好人,想食更甜美的士多啤梨.

最好星期四,五來.

因為六,日採摘人較多,星期一剩下青紅的.

星期二,好少少......到星期四,五就最SWEET嘞.

如果你係第一次去.上車時,可以請司機幫幫忙.

 

蘿蔔糕

蘿蔔糕,白雪雪,又光又滑好YUMMY.

圖2.是蒸完個面,真面目.

灑上蔥花效果都唔鍺,

但我更愛反底作面......更滑更美.圖1

 

我都係想年年有餘,唔想年年洗白白呀.

隨上灑上蔥花,

稍修整就得嘞!

 

 

 

其實,平日飲茶,蘿蔔糕係阿仔必食的糕點.
只要有人愛吃,

我就會好樂意整.....努力做到合家人的口味.
自己又有得玩,樂趣自然雙倍啦!

 

鼻敏感湯

我個仔自幼就患上鼻敏感.
真係中西都試過
鼻敏感真係好辛苦.
平日,好少有兩個鼻孔可以一起呼吸.

老是一邊塞,一邊通.

真係想吸一口大氣都難

想有一晚甜睡,就更困難..

 

同大家分享呢一款-專治鼻敏感湯,鼻炎,增強免疫力.

不過,唔知係咪WORK,可能要好長時間,只好慢慢來啦!

材料:

辛夷花 18g

白芷18g

北芪18g

豬肉半磅.薑3片

12碗水.

水煲後,轉慢火.

所有材料放入一起煲大約1小時15分.

小小心得:

試了1次,家人飲到苦口苦面.

自行加1-2粒蜜棗,大有改善.

飲得碗湯落.

多謝各位的關心.
其實,患上鼻敏感是我個仔.
以前細過爸媽話看中看西,
都好乖聽從.
但長大後,就有自己的睇法.
認為看中看西都幫助不大,
唔想再被人搵笨Wor..
做阿媽,每晚聽到佢塞晒鼻,心都煩,好心痛!

媽媽的年糕-食譜

年糕年糕,寓意新的一年,步步高升.
夜貓吳太整左迷你年糕.
因我手力唔夠,試用機拌勻,WORK呀.
緊記開半分鐘,停機.一會,再開,以免燒機.

媽媽教我一定要拌勻,直至唔見有白色.
我真係無能力,手都軟啦!
份量少少,用機幫手,大約2分鐘就OK,幾快手.

依家請大家重溫2013年1月的製作片段.

媽咪做的年糕擺兩星期都好好食.

好多親友食過媽咪的年糕都食指大動.

日前,我要求媽媽由頭到尾做一次給我看.

製作過程最辛苦就係要握住枝棍,
用力攪拌.....而且,愈來愈要用力.
真係食左都補唔番呀!
材料:
1.煮滾1/3碗油,盛起留用.(但要留1湯匙油.)
2.糯米粉600g+?水,

大約550g(分次加入)開勻拌成麵團

3.將原鑊剩的1湯匙油.加入蔗糖4條+2又3/4碗水.
中火煮至糖溶.

4.將2料分成好多件,大約20多件.
先放入10件.邊煮邊攪.再慢慢加入其餘的.

不停攪拌,分次加入熟油.有時剷底加入油.
煮至就快乾水. 好似糖不甩.

待再煮到收乾些水.
然後,媽媽用枝棍攪拌.
我只捉實個盤.

怕媽咪弄傷手.....
等我來啦!
哈....我玩唔到10秒鐘,大叫老父接棒....老襯嘞!
媽咪做導演,要用力攪到顏色均勻,唔見白色呀!
老父笑言:我唔夠眼,看不到有白色bor.
老媽: 未得呀!叫你做就做啦!!
我只會哈哈大笑.
今次真係辛苦老爸媽了.
比番d掌聲先

好不容易才攪拌好,平分兩盒,年糕仲有點點餘溫!

小心得:

做這款年糕,最好有位大力士幫手攪.

雖然,糕面不夠蒸的平滑.

但充滿媽媽心意手藝的年糕,

一食就知道,街外係買唔到呢!

 

牛角酥-食譜加造型

 

 

朋友仔問我:你會整牛角酥/丹麥吐司嗎?

我即時O咀:吓?要做酥皮,好巧功夫喎,我未整過呀!

有空試一試啦!

一連兩晚都想住牛角酥,估唔到自己癡得咁緊要.

怕失敗,浪費材料白費心機...

都係要走去書店打書釘.一看又2粒鐘.

回家馬上開工.

經過好多小時的推推摺摺.
我的第1隻小小牛角酥出爐了,好香牛油味呀.

YUMMY! 有DD喜出望外......呀.



食譜(6隻迷你牛角酥)

材料:

A.高筋粉100g 奶粉5g 糖10g 幼鹽2g

快速依士1.5g(金燕) 水55g 牛油5g.



B.內面夾牛油45g

 全蛋液少少 ,掃面用.

做法

1.先將材料A(除牛油)開機拌勻成雪花狀後,

加入牛油.攪成麵團,發酵大1倍.

2.材料B切成薄片，放在保鮮紙上，

轆成均勻4x4正方形薄片.放入雪柜備用.

3桌面撒少許高筋粉，倒出麵糰拍扁排氣，壓成圓形，

用剪刀在中間剪十字,不要剪穿麵糰.
反出成方形,再轆成8x8正方形,約牛油片的兩倍.

4將牛油片打斜放在麵糰中間，包好，轆薄至8-9吋.摺3層.

放入雪柜雪25分鐘.其間反轉1次.

5.桌面撒少許高筋粉,轆薄至8-9吋,摺3層，

入雪柜雪25分鐘.其間反轉1次.

6.重複再做多1次.雪25分鐘

(這就是自家極品酥皮了.)

  

7桌面撒少許高筋粉,先將酥皮轆成8x6吋高的長方形.

平分3份,再切直角，捲好放於焗盤靜置40分鐘，

發大1倍,小心塗上全蛋液,為求美觀,邊位都掃上蛋液.

8.預熱焗爐200度,放入中層，焗大約12分鐘至金黃色

降溫至160度多焗3-4分鐘.

 

造形:我比較喜歡呢個做法.
先將直角三角形的直角,輕輕鬆開變等腰三角形,

三角形的底部剪開,向左右兩邊摺起.

然後捲起來,初初捲時,稍向外伸展.

下圖酥皮經我反複實習幾次,已經玩殘,走了樣.

 

小小心得:

1.麵糰無須發大2倍,太軟夾牛油反而不能有礙伸展.

如太軟身,可雪一下.

2.包油收口要做得好,減少漏油機會.

3.剛雪凍的酥皮,大力轆好易穿.

先用酥棍一下一下壓長,再推.

就容易掌握好多.

4.靚的牛角酥出爐要輕身,切開組織像蜂巢.

請你幫幫忙

我無意中發現有BLOG友正在找尋自己的網頁.
好高興好感動呀!
可惜,我3次CLICK入親子王國都不知如何回應!
如果你懂得,煩請幫幫忙啦!唔該晒.

非油炸角仔-食譜

馬年快到,想起自己的(舊作),
非油炸角仔.
重新post出來.
預祝大家馬年身體健康,生活愉快!

 

 

 

祝大家蛇年快樂,身體健康,笑口常開!

嘩.....原來焗角仔都好好食,真係脆卜卜
沒有加發粉都好脆呀!
我食完1隻又1隻,食到唔停口!
深色的好Yummy,是南乳味脆角仔.
饀料有崧子仁取代花生,椰絲,芝麻,砂糖.
雖然今晚已經是年初四,沒有人對整角仔有興趣.
但是我剛剛食了1隻,真係好yummy,要馬上同大家分享!

食譜:可做12隻
低筋粉   75g
糖粉   25g
梳打粉   1/8茶匙
蛋  12g
南乳10g南乳汁2g
油 30g
做法:
1.將低筋粉過篩,中心開一個穴.
注入蛋,糖,梳打粉,南乳,南乳汁,油拌勻.
2.把麵粉撥入,搓揉成麵團.
蓋上毛巾靜止20分鐘.
3.搓成長條,取大約12g麵團搓成小圓球.
用幹麵棍滾成鵝蛋形.約3吋x2又1/4吋的薄片.

4.先包入3g餡料.對摺.打直再加多1g餡料.就脹卜卜了.
如我一次過加入4g餡料,較困難包,易弄爆口.

想角仔好似脹卜卜的荷包,

就要豎起的角仔,餡料向下,

係咪有更多空位呢.?

預熱焗爐,用150度放中層焗20分鐘,
反轉用100度多焗2分鐘.
餡料:可隨個人喜好加減
崧子仁20g(烘脆)1粒開成2邊.芝麻10g(烘香)
椰絲6g,砂糖12g
所有餡料拌勻備用.
如用花生,炒香再弄碎.

小心得:
想角仔脆卜卜,皮要夠薄.
皮的修口位置,盡量不要沾上餡,
因為餡料會分隔角仔收邊位,好易裂開口呀!

2014年年有餘椰汁糕-食譜

 

眨吓眼馬年快到了 ,

等我整番幾條紅運當頭小金魚,

迎接新一年的來臨.

小小甜,帶點點椰香,唔錯呀!  

食譜材料:6條約4吋長

　

1.糯米粉 （60g）
2.澄麵 （48g）
3.椰漿kara （30g）
4.糖 （60g）
5水 （135g)

6.粟米油 （6g)

紅/黃色素 （少許）

7.入爐黑朱古力粒12粒(眼睛)

做法

1.糖加入水攪溶，待涼後加入椰漿中攪勻。
2.糯米粉和澄麵混合過篩。
3.將椰漿糖水加入粉類中攪勻，過篩隔粉渣.
4.分小部份（約2湯匙）年糕糊，加入食用色素攪勻備用.
5.用小匙倒入適量紅/黃色年糕糊入模內，大火蒸約 1分鐘至半熟.
6.再將白色年糕糊注入模中約9成滿。
7.以中大火隔水蒸約15分鐘，用竹簽插入後不沾粉即可。
8.脫模後,用牙籤開一小孔,貼上眼睛.
小心得:
魚年糕要放涼,四邊撥開,才可以脫模.
熱烘烘時脫出來好易變型啊.

錦鯉年糕 - 食譜

0

 

 

登...登...登....登!
我的金箔金魚年糕終於出世了!（只要點上小小金箔，顯得高貴又大方！）
輕輕咬一口　除香濃的椰子汁味，仲有香芒和士多啤梨，外面係買唔到！
農曆新年快到了，我祝大家牛年 - 萬事如意, 心想事成!

 
呢幾日,我埋頭苦幹整錦鯉年糕,真係食到我 E 起棚牙,

笑口常開...

以下食譜供大家参考　（可做６尾魚）
1. 糯米粉   　 １２０g
2. 粟粉          　　１２g
3. 椰漿         　１２０g (快達牌)
4. 熱水           　５０ｇ
5. 砂糖            　４５g
6. 菜油             　１２g
7. 煉奶             　１５g
做法:
1. 先將 (糖 + 熱水) 拌勻,放入微波爐 叮熱 至糖溶,加入煉奶拌勻,放涼!
2. 將 1,2 混合 過篩.
3. 糖水,椰漿拌勻 倒入(2)慢慢攪拌勻到粉冇粒（我用手動打蛋器，細小果隻）
4.再加入菜油拌勻.
5.取小小粉漿加入芒果香油,成金黃色
,如加入士多啤梨香油,就係紅色.　（蒸熟顏色會變得深色）　
6.模要掃油,先加入有色的在頭,鰭身,尾.... 蒸1-2分鐘,定個靚靚形狀.
7.再倒入粉漿,約9 成滿. 蒸20 分鐘.( 我有蓋上微波爐保鮮紙)
記得稍放涼後先脫模呀！
我想切開一條俾大家睇吓先！
唔知點解，我睇住條魚，個心卜卜跳．
哈哈！原來．．．．．我真係唔捨得切呀！
小小心得
我覺得這款年糕比圓形,方形都困難些少
太稀 - 脫模後似條鼻涕蟲.
太杰 -輪廓不清,樣子就會唔夠靚!