朱古力粒曲奇-食譜

呢款曲奇,真係好食,好脆又易做,今日整左兩樽.食到唔停口

食譜:

低筋粉 82g

谷古粉(冇糖) 5g

梳打粉    1/4茶匙

金桶牛油 50g (室溫放軟)

雞蛋25g(打散)

幼黃糖    45g  愛甜的朋友可加多5-10g

入爐朱古力粒    42g

幼鹽     1/8茶匙
做法:

1.金桶牛油加黃糖,鹽 打至鬆身.

2.分2-3次加入蛋液,每次都要攪拌勻至光滑.

3.將所有粉類篩1次,加入拌勻.

(我先開機用慢速只拌8-10秒,再用膠刮拌勻)

4.加入朱古力粒拌勻, 放入雪柜雪20分鐘.

5.預熱焗爐,160度 焗 15-18分鐘, 平均每粒 7g-8g重.

可做32隻. 焗完直徑有1.5吋, 精緻又大方!

 

溫馨提示:

一定要預留空間,

以免曲奇膨脹互相黏著.

出爐後,將曲奇放在架上放涼才入樽.

最好加入1包食用防潮珠.

蘭苑- 悠閒下午茶

我好鍾意同牛牛去中文大學看花,賞鳥閒遊!

近月開了間餐廳-蘭苑!(星期日休息)

我兩到來好幾次,早午餐都食過,

每次都想同大家分享,都係得個(想)字!

今次的起心肝!

兩人叫左3個下午茶,有沙律,炸魚柳(深色左似豬扒)

吞拿魚焗薯,合共71元!

 

西多士有機會先食,仲有少少咳呀!

 

 

點解我咁喜愛呢度呢!

我愛這兒的園林景色

愛這兒的貓

看!小花貓老遠見到我,

就飛奔投進我的懷抱!

好SWEET呢!   

 

 

 

 

 

 

 

 

 

冬甩-附加製作圖

這是我的第一個冬甩.好好玩呀!

本來做兩隻,可惜有一隻拎起時黐左底,

搞到漏晒氣!

 

 

 

 

哈哈!之前漏晒氣果隻,

經我再搓揉,再發,半煎炸,幾靚Bor.

 

 

第1次整冬甩(甜甜圈),覺得好玩又好食.

 

將麵團搓長,一端壓平.

將一端與壓平的重疊,接點處收好口.像個小水泡.

記得將冬甩沾上麵粉,可以防止拿起時沾住.

待發大兩倍.

放入預熱的油,先炸一面,再反轉炸另一面.

 

 

 

 

炸到金黃,趁熱沾上砂糖

美心皇宮晚飯/涼瓜炆黃立倉(食譜)

上星期,我兩個悶蛋走左去德福美心皇宮食晚飯.
味味牛牛都讚不絕口,佢話呢D咁花功夫嘢.

當然出街食啦!

無意中我見到一味家常菜,我好多時都會煮的-涼瓜炆黃立鯧.

 嘩!原來要$168元呀!我就冇叫黎食嘞

不如同大家分享我的烹調心得啦.

剪去魚鰭,煎得更靚

 撕開魚膜把內面血清除

 

食譜材料:

黃立鯧 1條 (10兩)

涼瓜1個,

豆豉1湯匙,糖1/4茶匙

蒜茸1湯匙

紅椒1隻

薑2片

 

 

醃料:

1/4茶匙鹽,胡椒粉少少,生粉半湯匙(後下).

 

調味料:

紹酒1/2湯匙

 

水1碗,蒸魚豉油1茶匙,老抽1/4茶匙,

糖1/2茶匙,,生粉各1/4茶匙拌勻

 

獻

生粉1/2茶匙,水半湯匙拌勻

做法:

1.魚洗乾淨,吸乾水份,加醃料醃15分鐘.

2.趁呢個時間將豆豉1湯匙加糖1/4茶匙拌勻,蒸10分鐘.

3.涼瓜洗乾淨,去籽,刮去白色,斜切小件.

加1少撮鹽醃10分鐘,沖水瀝乾水.

4.燒熱1湯匙油,將魚撲上薄生粉,(魚身可劃幾刀),
兩面煎至金黃剷起.

5.用餘下油,爆香薑,蒜茸,加入涼瓜,已蒸的豆豉,炒幾吓.

放入魚,灒酒.下調味料蓋上中火煮4分鐘

埋獻上碟.

溫馨提示:

短肥大的涼瓜,瓜味更濃更苦.(大釘)

長身的涼瓜苦味比較輕.
魚身劃幾刀,快熟易入味

以免彈油,魚一定要吸乾水,特別個鰓,魚肚內.

 

 

呢條1斤4兩,好肥美呀 

梅花包

 

我好鍾意梅花包的造型.覺得好靚,好似朵梅花.

於是,專登買包貴價芝士雞肉腸.

鬼咁開心整比牛牛食.以為佢會好欣賞啦.!

點知換來一句-畫蛇添足.

整番吞拿魚包咪好囉.

做咩整D咁ga包. 腸仔入面D芝士好難頂.....食到作嘔

氣得我快要哭起來
 幾大都頂住,一連塞了兩朵花入口,超飽呀!

 

 

 

 

 

 

軒姐的新書

隨手打開軒姐的新書,

就係色香味俱全的話梅豬手.

記得我第1次跟你做,一食難忘,非常美味.

 

雖然,我暫時未有空細閱你的著作,

但相信你一定寫左好多入廚心得.

我有空慢慢睇,學番兩招招牌菜!

祝你新書銷量好,萬事如意,身體健康!

 

 

 

 

送上我的陳皮豬手,

煮了兩次話梅豬手

換一換畫.

喜出望外,好Yummy呀!