2014年4月26日星期六

免搓包樂悠悠-附加麵種/食譜/造型照片

愛上手工包包,
少少麵粉就可以玩半天.
真係好開 心!
最緊要係唔使搓都一樣好食呀!
一共4款,總有一款你會LIKE.
有大鼻豬小姐.
可愛小魚兒,
辮子包,
也有像女士的髮髻.

有空同大家分享食譜和造型






呢款包包,我曾擺放了3日,依然好軟熟.

應該係麵種的好處了. 又同大家分享吓.吹吓水先.

麵種:

高筋麵粉 160g

水96g

快速依士2g

 

做法:


1.將材料放入攪拌器中,以慢速攪勻,再轉中速拌勻.
(初時似雪花狀.Keep住用慢速攪拌.
此時,可停機將盆四周的碎粉拌勻,再開機好快成團.)

2.滾圓,放入已塗油之盤內發酵2小時。


3.取出排氣,再分割成4等份, 然後分別滾圓。

4.發酵完成的麵糰,可以即時加入主麵糰中使用.

5又可分別用保鮮紙分別包好,放在冰箱中,可存放一個月。

6 到使用前取出,室溫回軟便可使用。


食譜份量可做4個包包
麵種1份.

主麵團材料:

80g高筋粉.

砂糖10g

牛奶48g

蛋液12g

奶粉4g

依士2g

幼鹽1/4茶匙

牛油4g,椰子油或菜油4g
做法:

1.麵種加入主麵團所有材料用機攪拌勻.

2.滾圓,放入已塗油之盤內,蓋上保鮮紙,發酵大兩倍,

大約40分鐘.

3.分割成4等份,滾圓蓋上保鮮紙,鬆弛15分鐘.

4.造型後,蓋上保鮮紙作最後發酵.約45分鐘.發大兩倍.

5.小心塗上蛋液,灑上芝麻.

6.預熱焗爐,170度,大約焗15分鐘.


 

 


麵團壓成長條形,塗上花生醬對摺.

切幾刀,頭尾不要切開,輕手拉長.

抓實兩端,左右手反方向擰.

然後,打上一個結.



 
小小心得:

編織包,頭尾都要捏緊,以免焗時脹大鬆開.

 


2014年4月25日星期五

二人晚餐-番茄炒蛋-附加食譜(分蛋法)






兒子長大,為工作,為生活忙碌.

好多時都會得番我地兩人開餐.

二人餐,好簡單!

打開雪柜有咩就煮咩!

有雪到冰硬的三文魚尾,

有蛋又有兩個蕃茄

 

 

就煮我小時候好愛食的蕃茄炒蛋.

 

老了更愛.

更難得老伴一樣喜愛.

每次食相仲好滋味

咁美味10元都唔使呀!

不過,我打蛋的方式可能有點奇怪?

 

呵呵!可能玩蛋糕玩得多啦!

 

我會用分蛋法打蛋

即先打蛋白再加蛋黃打勻,
再滴兩滴油. 少少鹽打勻.

大家都見有兩隻碗.

蛋白連蛋黃一起係細碗D呀!

 

 

食譜:

蛋2隻

蕃茄2個350g去皮去籽切件

茄汁1湯匙

薑2片

 

調味:

鹽少少

糖1/4茶匙

 

做法:

1.燒熱鑊,加1湯匙待油一出煙.

 

2.加入雞蛋,轉最細火.將蛋從底部一層層剷起.

大約8成熟,用碟盛起.

3.薑略煎香,下蕃茄快炒,加1湯匙水,少少鹽,糖煮至腍.

加入茄汁兜勻.

4.除去薑,將蕃茄淋在蛋上面, 加上蔥粒

用筷子挑幾吓就成紅,黃色相間,

美不勝收的開胃餸.
 
溫馨提示:
要有蛋香,鑊要紅,油要熱,蛋落鑊傳出炸一聲
收細火或熄火,層層反起.唔會煮老蛋
因為打散蛋時加了少少油,起鑊用1湯匙已足夠.
 
蕃茄我會似乎size,大的多數喜歡在底部界個米字,
有時仲界多兩刀.放入滾水中1分鐘,沖水好易剝皮.
 
 
 
 

2014年4月24日星期四

涼瓜黃豆排骨湯-食譜






今日想同大家分享我小時候最怕飲的湯-苦瓜湯.

但依加卻變成我愛煲的湯水bor.

回想起媽咪的苦瓜湯,真係好苦.....苦到我反胃呀

未飲完碗湯,不准起筷

 

我為了想家人易飲入口.

 怕太苦無人問津,浪費食物事小,
枉費我一番心意事大呀!

除左切成似花形,睇落靚D.
仲會加入鹹酸菜,1粒蜜棗,中和涼瓜的苦.

又真係好神奇,呢款湯加左鹹酸菜,蜜棗...

的確苦瓜不再苦,只有點點甘味.

 

食譜:

涼瓜320g

排骨350g

黃豆100g

鹹酸菜130g

薑2-3大片

1粒蜜棗

白胡椒粒10g

 

水1800-2000ml

 

調味料:

鹽少少

 

做法:

1.黃豆用水浸30-45分鐘,沖洗瀝去水份備用.

2.鹹酸菜撕開一塊塊,浸水10分鐘,沖洗瀝去水份.

3.涼瓜洗乾淨,切成圓環形,約1吋半闊,去瓜囊.

4排骨飛水,洗乾淨.

5.煲滾水,放入所有材料,中大火煲15分鐘煲,

轉小火再煲1小時15分,加入少少鹽.(試味) ,

再開大少少火,煲10-15分鐘.

溫馨提示:

最後開大少少火,把湯味完全釋放出來,更香濃.

白胡椒粒可暖胃,令湯增加香氣.

但唔喜歡胡椒味會聞到(壓味).

我試過白鑊把白胡椒粒炒香才煲,一樣有味.

至於鹹酸菜,我會挑選淺色的,更嫩.

2014年4月23日星期三

悠悠閒遊坪洲

 
我兩幾多年沒有去坪洲呀?
                  牛牛:30年都有了.
                 我(玲玲):嘩....我地係咪好老喇.
                  牛牛:仲使問....行啦!







原來在島上可眺榆景







海南雞,50多元半隻.

菠蘿海鮮炒飯,好足料呀.50元都唔使,抵食.




2014年4月19日星期六

快樂的小雞Cup cake

 
祝大家復活節快樂

 

手工看來嘛嘛地,

但望住笑呵呵的小雞,

自己也哈哈大笑起來.