士多啤梨果醬-食譜

 

自家製士多啤梨果醬,

 

味道天然,

 

未食都令人口水流.

 

多謝Blog友阿怡的分享.

 

 

先同大家分享我的搞笑心得先:

由於士多啤梨採摘時間倒算數都係得兩星期.

再同牛牛走去草莓園.

今次D士多啤梨雖然細細粒,

但更甜美.(雨水過後的比較淡味.)

咁多草莓試吓整果醬啦.

以為150g草莓可以整1樽啦

幾辛苦才尋找到1個樽

我為了要把樽消毒.....又滾又焗

煮好了,我冇偷食呀.得咁多多咋

得3湯匙55g-60g左右,

使咩入樽呢!!??

我下次最少都要煮1磅呀.

 

 

愛上食自家製的竹炭合核提子包,

點上少少果醬,又係另一種的食法,好醒胃.

 

 

 食譜:

士多啤梨 （150g）

糖 （50g）可 按個人口味,加或減糖.

檸檬汁 （8g）

 

預備1個玻璃樽

1.洗淨玻璃瓶和蓋。

2.放入滾水中煲10分鐘。

3.滴去多餘水,用廚紙索乾水份後，將蓋及瓶身倒轉放入已預熱的焗爐(大約110度）約20分鐘。

4.剪一塊比瓶口稍大的保鮮紙/牛油紙。

做法

1.將有機士多啤梨洗淨，去蒂，用廚紙完全抹乾水。

2.加入半份糖及檸檬汁攪勻，放入雪柜雪1個半小時.

 

3.用中火將士多啤梨連糖水煮至軟身。

4.轉細火，加入其餘半份糖至溶解。

 

5然後開大小小火，邊煮邊攪拌,慢慢煮至杰身即成。

  

6.趁熱倒入瓶中，需預留少許空隙位置，不要倒太滿 。

7.把圓形保鮮紙/牛油紙實貼於果醬面上,

輕手按平,壓走紙內的氣泡。

8.瓶身稍涼，才從焗爐中取出瓶蓋上緊。

9.倒轉放下直至完全冷卻，然後放入雪櫃中儲存。

 

 

小小心得:

1.煮好的果醬,放涼後會更杰身.不要煮得太杰.

2.因為沒有添加防腐劑，保存期始終有限，所以應盡快吃完！

一般而言，可存放20天。

2.在製作過程中如處理不當，亦會直接影響存放期限，例如瓶中有濕氣，生果洗淨後未有徹底印乾，沒有趁熱入瓶，及沒有倒轉放涼等等.